Katalogazioari dagokionez, gutxitan sakondu izan dugu baliabide jarraituen katalogazioan eta, ALDEEn uste dugu, benetan beharrezkoa dela lan hauetan ari diren profesionalek horren inguruko ezagutza izatea, batez ere, sarean lan egiten dutenen artean. Euskadiko Irakurketa Publikoko Sareko arauei jarraituz, baliabide jarraituak nola katalogatu behar diren ezagutzea izan zen ikastaro honen helburu nagusia.
Hori dela eta, aurten Baliabide jarraituen katalogazioa izeneko ikastaroa antolatu dugu Oihane Oliveri adituaren eskutik. Bereziki, dagoeneko katalogazioan lan egiten duten EIPSko profesionalei zuzendutako formazioa izan zen eta sakon aztertu eta eztabaidatu zituzten Oihane Oliverik ekarritako hainbat eta hainbat baliabide jarraituren adibide eta eredu. Hiru eguneko ikastaro hau Donostiako Haur Liburutegi Nagusian egin genuen.