Archivo de la etiqueta: ueu

Actividades ALDEE, Noticias

INFORMAZIO ETA DOKUMENTAZIO KUDEATZAILEEN VIII. BILKURAN LIBURUTEGI DIGITALAK IZAN DITUGU HIZPIDE

Deja un comentario
Aurten 30 laguneko taldea bildu da VIII. Bilkuran.

Ekainaren 29an UEUren egoitzan 30 laguneko taldea bildu ginen Informazio eta Dokumentazio Kudeatzaileen VIII. Bilkuran. Aurten, iazko esperientzia errepikatuz, ASNABI eta Bilketa Euskal Funtsen Atariko lagunekin antolatu dugu jardunaldia. Eraldaketa digitalaz hitz egin nahi genuen eta hala antolatu dugu bilkura “Liburutegi, artxibo eta atari digitalak: digitalizazioaren erronkak Euskal Herrian” goiburuarekin.

Gaia aletzeko gurekin izan ditugu Mikel Aizpuru, Eusko Jaurlaritzako Kultura Ondare Zuzendaria, Euskariana egitasmoa azaltzen; Marie-Andrée Ouret eta Peio Jorajuria Bilketa Euskal Funtsen egitasmoaren arduradunak Baionako Mediatekan; Martin Jesus Saragueta, Nafarroako Liburutegi Zerbitzuko Zerbitzu Digitalen Bulegoko arduraduna eta ASNABIko kidea; Jone Arroitajauregi, Mondragon Unibertsitateko Goi Eskola Politeknikoko eBiltegia sarbide irekiko biltegi instituzionalaren arduraduna; eta Maribel Nieto Freire, EHUko Gipuzkoako Campuseko Liburutegiko Dokumentazio Zerbitzuko arduraduna.

ALDEEko idazkariak, Oskia Agirrek, hartu du aurten jardunaldiak antolatzearen ardura nagusia ASNABIko eta Bilketako kideen laguntzarekin. Hori dela eta, UEUren Unibertsitatea.net blogean argitaratu berri duten elkarrizketa ekarri dugu hona, aurtengo jardunaldiaren nondik norakoen berri gehiago jakiteko.

Oskia Agirre Orbegozo

Oskia Agirre: “Baliabide teknologikoez gain, profesionalen prestakuntza eta balioespena ere beharrezkoak direla ikusaraztea erronka handia da”
Actividades ALDEE, Jornadas, congresos, seminarios y talleres, Noticias, Sin categoría

Informazio eta Dokumentazio Kudeatzaileen VII. Bilkura: Euskal Autoritateak finkatze bidean

Deja un comentario

2021eko uztailaren 1ean Informazio eta Dokumentazio Kudeatzaileen VII. Bilkura egin zen Eibarko Armeria Eskolan, UEUren udako ikastaroen baitan. Aurtengo bilkura EAL-Euskal Autoritateen Lantaldeak antolatu zuen honako izenburu honen pean: Euskal Autoritateak finkatze bidean

1. Zer da EAL?

Euskal Autoritateen Lantaldea (EAL) 2017. urtean sortutako ekimen profesional bat da, eta euskarazko izen-abizenak dituzten pertsona-autoritateak euskaratik finkatu eta bateratzea du xede. Biblioteka nazional ororen egitekoa den hori, alegia, sistematika batean oinarritutako irizpideei jarraituz autoritateak finkatzea, egiteke dago euskal jatorriko autoritateen kasuan hizkuntza irizpideei dagokienean. Ageriko hutsune horri planteamendu tekniko batekin erantzun nahi izan zaio eta, horrela, Euskal Herriko zazpi lurraldeetako eta mugaz gaindiko euskal diasporako liburutegi eta dokumentazio zentroetako profesionalen arteko elkarlanean oinarritzen den EAL egitasmoa sortu da.

Bestalde, EAL lantaldeak eta Eusko Jaurlaritzaren Ondare Zuzendaritzak adostutako elkarlanaren ondorio da AUBI (Autoritate Elebidunen Katalogoa) katalogoan EALek onartutako 225 autoritate inplementatu izana eta bide horretan jarraitzeko asmo sendoa egotea.

Lantaldearen helburu nagusia da erreferentzia fidagarri, bateratu eta iraunkorrak sortzea, bai euskal profesional eta liburutegientzako, eta baita nazioarte mailako egitura normatiboei begira ere (BNE, BNF, LC, VIAF, ISNI…).

Ordezkaritzari dagokionez, erakunde hauetako profesionalek osatzen dute lantaldea: Baionako Mediateka, Bilketa egitasmoa, Uztaritzeko Ikas Euskal Pedagogia Zerbitzua, Baionako Euskal Museoa, ASNABI-Nafarroako Liburuzainen Elkartea, Eusko Jaurlaritzaren Ondare Zuzendaritza, EIMA Katalogoa, Renoko Jon Bilbao Basque Library eta HABE Liburutegia.

2. VII. bilkura, lehen aldiz, lau erakunderen artean antolatua

EAL taldeak ALDEEren zuzendaritzaren gonbidapena jaso zuen 2021. urtearen hasieran, hain zuzen ere, ALDEE eta UEUren artean azken sei urteetan antolatu izan duten “Informazio eta Dokumentazio Kudeatzaileen Bilkura”ren zazpigarren saioa EAL taldeak antola zezan. Baita antolatu ere!

Euskal autoritateekin lan egiten duten biblioteka, dokumentazio zentro eta beste hainbat ekimenetako ordezkari andana biltzeaz gain (ikus beherago), aurtengo jardunaldi honek aipatua izatea merezi duen aldaketa nabarmen bat ekarri zuen: hain zuzen ere, aurtengo bilkura hau lau erakunderen artean antolatua izan zela: ALDEE eta UEU (urterokoak) eta, horiez gain, lehen aldiz, Nafarroako ASNABI elkarte profesionala eta Baionako Mediateka-Bilketa egitasmoa. Horrela, bada, era naturalean egin dute bat Euskal Herriko hiru eremu administratiboetako ordezkari profesionalek eta UEUk, dokumentazioaren alorreko profesionalei jardunaldi bat eskaintzeko. Pentsatzekoa da aurrerantzean ere aliantza honek bidea urratzen jarraituko duela.

Honako hauek hartu zuten parte VII. bilkuran, ALDEEren kudeatzaile den Lore Agirrezabalen gidaritzapean: Idoia Sobrino (Asnabi eta EAL), Pruden Gartzia (Azkue Biblioteka, Euskaltzaindia), Nere Erkiaga (Xenpelar Dokumentazio Zentroa), Mikel Elorza (Armiarma), Irene Arrarats (Berria), Galder Gonzalez (Euskal Wikilarien Kultura Elkartea), Oihane Oliveri (HABE Liburutegia eta EAL), Marie-Andrée Ouret (Baionako Mediateka-Bilketa eta EAL), Iñaki Arrieta (Jon Bilbao Basque Library eta EAL), Eguzki Urteaga (EHU, Eusko Ikaskuntza), Maite Lopetegi (NorDaNor-Euskal itzulpengintzaren datu-basea, EIZIE), Amaia Torrealday (Mondragon Unibertsitateko Biblioteka), Roberto Kerexeta (EIMA katalogoa eta EAL).

3. Euskal autoritateak finkatze bidean

Bilkura hau antolatzean bi helburu nagusi planteatu zituen EAL lantaldeak: batetik, parte-hartze zabala ziurtatzea, arazoaren transbertsalitatea agerian jartzeko eta, bestetik, lantaldearen bost urteko ibilbideak emandako emaitzak aurkeztea, finkatutako lan-prozedura eta metodologia, emandako aurrerapausoak, aurkitutako arazoak, eta abar. Azken finean, nahi zena zen euskal pertsona-autoritateak finkatzearen gaia gizarteratzea eta esparru bereko eragile ezberdinen artean adostasunak, konplizitateak eta aliantzak sortzeari aukerak ematea, aurrera begira egin beharreko urratsei sendotasunez ekiteko.

Bi helburu hauen lorpen-maila handia izan zen eta, zorionez, egitasmoa indartuta atera zen, sinergia ugari sortu ziren eta etorkizuneko lanak lehentasunen arabera antolatzeko oso lagungarria gertatu zen.

Horrela, bada, EAL-Euskal Autoritateen Lantaldeak bi bide hauek jorratzen jarraituko du aurrerantzean ere: pertsona-autoritateak finkatzea, batetik, eta erabakitako forma horiek ahalik eta hedapen zabalena izan dezaten, administrazio ezberdinetako erakundeekin eta eragileekin elkarlanean aritzea, bestetik.

Imanol Irizar

Actividades ALDEE, Profesionales, Sin categoría

Garapen profesionalerako konpetentzia digitalari buruzko ikastaroa

Deja un comentario

Aldee elkarteak aurten eskaini duen azken ikastaroa izan da hau, online egin den bakarra, UEUren elkarlanari esker eta Rakel Gamito irakasleak gidatuta. Urriaren 29an hasi eta abenduaren 10ean amaitu da. DigComp proiektuan oinarritutako ikastaroa izan da eta bertan konpetentzia digitalaren funtsezko osagaiak identifikatu dira, beharrezkoak diren ezagutza, trebetasun eta jarreretan gaitasun digitala lortzeko.

Hauek dira landu ditugun konpetentziak:

  • Informazioa eta informazio-alfabetatzea

Gure arloko informazio-iturriak zeintzuk diren identifikatu ditugu eta horiek modu eraginkorrean erabiltzen edota kudeatzen ikasi behar dugula garbi gelditu zaigu.

Hau da, informazioa bilatzea, datuak lortzea, datu horiek fidagarriak diren ala ez egiaztatzen jakitea; lortutako informazioa ordenatzea, gordetzea eta behar den tokian erabiltzen jakitea.

  • Komunikazioa eta lankidetza

Gure arloan, lankideekin, profesionalekin, gure lantokiko beste pertsonekin edo lana edo bizitza pertsonalean harremana dugun beste guztiekin, nola komunikatzen garen eta zer erabiltzen dugun hori egiteko ikasi dugu. Hainbat tresna probatzeko aukera eman digute eta horietatik erabilgarrien iruditu zaizkigunekin sakontzeko beta izan dugu.

  • Edukiak sortu

Edukiak sortzeko tresnak ezagutu ditugu: testu-dokumentuak sortu; PDFak kudeatu; erabiltzen ditugun irudien, bideoen eta audioen eskubideak kontuan izan eta sortze prozesuan nola editatu eta forma eman; mapa mentalak egiten ikasi; aurkezpenak, posterrak, infografiak… Hau guztia kudeatzeko tresnak ikusi ditugu.

  • Antolaketa

Biltzea, kudeatzea, antolatzea, prozesatzea, gordetzea, berreskuratzea… DigComp markoan askotan errepikatzen diren aditzak dira.

Hori dela eta, zereginak, ekintzak, oharrak, mezu elektronikoak, informazioa, webguneen helbideak, pasahitzak eta bibliografia antolatzeko baliabide digitalak eta abar ezagutu ditugu.

Bukatzeko, proiektu bat landu dugu eta gure burua prestatu gehiago ikasten jarraitzeko.

Jornadas, congresos, seminarios y talleres, Sin categoría

Informazio eta Dokumentazio Kudeatzaileen VI. bilkura

Deja un comentario
Jardunaldian parte hartu zuten hizlariak eta ALDEE elkarteko ordezkariak.

Seigarren urtez, Informazio eta Dokumentazio Kudeatzaileen Bilkura antolatu genuen ALDEEk eta UEUk. Aurtengo gaia: “Tokiko bildumak. GLAM erakundeek eta komunitateek tokiko memoria elkarrekin eraikitzen”.

Bilkuraren helburuak honakoak izan ziren:

  • Tokiko bildumen soslaia margotu; egitasmo nagusien egoera, lorpenak eta ohiko oztopoak.
  • Tokiko memoria elkarlanean biltzeko egitasmoak ezagutarazi; eragileak, rolak eta komunikazioa.
  • Tresnak eskaini ondarea elkarrekin bildu, tratatu, gorde eta hedatzeko.

Bost eragile ezberdinek hartu zuten parte, tokiko bildumen eraketa anitza eta ikuspegi zabalago batetik ikusteko aukera eman ziguna: 

JESÚS GUTIERREZ   Eibar F. T. Fundazioa 

“Sentimendu baten kudeaketa”

Azkenengo urtetan Eibar Futbol Taldeko historia berreskuratzeko egin dituzten ikerketen berri eman zigun. 

Nahiz eta azkenengo denboraldietan lehenengo mailan egon gora behera asko bizi izan dituzte aurreko hamarkadetan. Horregatik beraien erronka sustraietara jotzea da: non dauden baloratu eta nondik datozen ez ahazteko. Eibar F. T. aren Museoa antolatzeko helburua ere badute. 

AINTZANE AGIRREBEÑA   Badihardugu. Ahotsak proiektua

“Ahozko ondarearen artxiboa. Deba Ibarretik Euskal Herrira”

Ahotsak.eus proiektuaren helburuak honakoak dira:

  • Euskal Herriko ahozko ondarea batzea: etnografia, memoria historikoa eta hizkerak.
  • Materiala jaso, antolatu, landu eta hedatzea.
  • Elkarrizketa berriak bideoz. Grabazioak helburu, ez bidea.
  • XX. Mendeko euskal ahozko artxiboa osatzea.

Helburu hauek lortzeko asmoarekin, grabazio zaharrak bildu eta digitalizatzen dituzte elkarrizketa barriak jasotzeaz gain. Gero grabazioak herrika katalogatzen dituzte, kodifikazio batzuei jarraituz e.a. 

MIKEL LEOZ   Albaola Itsas Faktoriako Ondarearen  Teknikaria

“Albaola: itsas ondarea hedatzen”

Itsas ondarea beraientzat, gizakiek itsasoarekin harremanetan jartzerakoan lortutako zantzu kultural guztiak biltzen duen esparrua da: itsasontziak, errezetak, dantzak, kantak, ontzigintza tradizionala… Eta hau guztia biltzen da Albaolan lan esparru hauek dituelarik:  ikerkuntza, eraikuntza, nabigazioa-praktika eta hedapena. 

Hedapenean zentratu zuen bere hitzaldia. Bere hitzetan, behetik gora egindako proiektuek emaitza hobeagoak ematen dituzte – beraien kasuan bolondresekin, administraziotik dirua lortuz… 

MARGA ANZUELA   Donibaneko liburutegia

“Ubera liburutegia: parte-hartzeko prozesuak liburutegian”

Tokiko bilduma beraien nortasunean oinarrituta dago eta biltzen joateko, parte-hartze prozesu asko izan dituzte. Komunitatea proiektuaren ardatza izan da hasiera-hasieratik.

Oinarrizko kontzeptuak liburutegi honetan honako hauek dira: jakin-mina, emozioa, inspirazioa, sormena, irakurketa era zabalean, komunitate-sentipena, identitatea, ingurua, historia, ezagutza kolektiboa bultzatzea, elkartzeko gune bat izatea eta pentsamendu kritikoa. Eta ildo estrategiko hauek jarraitzen dituzte: 

  • Liburutegia errotuta komunitatean: sinergiak sortu, hirugarren gunea, tokiko historia ezagutu eta sustatu, ezagutza kolektiboa sustatu.
  • Irakurketa liburutegitik haratago: liburua bitarteko, arte guztiak sustatu, bizipenak kontuan izanda interesa sortu, pentsamendu kritikoa landu.
  • Sormenaren garapena: aukera eman, nork bere garapenean sormenari bidea egiteko, herri sortzailea bultzatu, liburutegian bildu eta zabaldu litezkeen edukiak sortu.

Haien tokiko bildumak jasotzen duena zera da: dokumentuak, fototeka, Sanjuandarren memoria eta wikipedia.

ARKAITZ ARTOLA   Gordegia. Egiako artxibategi grafikoa

Egiako auzoan badago 6 laguneko talde bat, argazki bilduma ederra biltzen eta sailkatzen ari dena. Auzoko teila fabrikak bere entitateari buruzko argazkiak bilatu nahi zituela eman zion bilkada talde honi. Bildumak ezaugarri zehatz batzuk izan behar zituen: herrikoia izan, webgune antolatu batean, lizentzia askekoa… 

Lagun taldeak argazkiak jaso, eskaneatu eta tratamendu teknikoa eman ostean (deskribatu, gaiak eman, urteka sailkatu…) webgunean jartzen dituzte eskuragarri.