Udal liburutegiak eta eskolak elkarlanerako gogotsu

Abenduaren 1ean Donostiako Haur Liburutegi Nagusiko aretoa leporaino bete genuen "Liburutegi publikoa eta eskola liburutegia: ezinbesteko elkarlana?" ikastaroarekin. Aspaldiko partez, berriro elkartu genituen hezkuntza arloko eta liburutegien esparruko profesionalak elkarlanerako aukerak ezagutzeko eta martxan jartzeko helburuarekin. 2026an berriro egingo dugu ikastaroa, aurten itxaron-zerrendan geratu direnekin.

Euskadin eskola-liburutegiek bizi duten egoerak eraginda, geroz eta udal liburutegi gehiago dira eskolekin harreman estuan lanean ari direnak. Askotan, ordea, egitasmo edo norantza jakinik gabe ari dira. Hori dela eta, eskolen eta liburutegien arteko elkarlanak bultzatzen hainbat urtez aritu den profesionala ekarri dugu liburutegien eta ikastetxeen artean sekulako interesa piztu duen ikastaro hau ematera: Dolors Madeo, Gironako liburutegi publikoen sarean lan egiten duen liburuzaina, bertan koordinatzen du eskola-liburutegien eta hezkuntza-baliabideen programa.

Madeok Gironako esperientzia partekatu du, baina hemen ere hainbat elkarlan-esperientzia badaudenez, horiek ere entzun nahi izan ditugu: Markina-Xemeinen udal liburutegiak eta eskolak duten lankidetzaren ingurukoak kontatu dizkigu Igor Idoeta liburuzainak eta Baztango Liburutegia egitasmoa kontatu digu horren sortzaile den Idoia Sobrino liburuzainak.

Ikastaro honek izan duen harrera dela eta, itxaron-zerrenda luzea osatu da eta 2026ko martxoaren 13an ikastaroa errepikatu egingo dugu.